Pakistan k Baghi Tolay or Hamara Mustaqbil

Posted on October 13, 2013



Hum is haqeeqat se inqaar nhi kr skty k hum ba-hesiat qoum is waqat Baghi Tolon me butt chuky hen aur hum me se her koi kisi na kisi tolay ka hissa zaroor hy. Yeh tolay mukhtalif noiyat k hen, in me Mazhabi, Lasani, Sobai or Siyasi tmam groups shamil hen. Is se koi inqaar nhi k itny Tolon me buttny se jo ek khala bn gaya hy us khala ka anti-Pakistani forces poora faida utha rahi hen. Mehsoos yoon hota hy any waly waqat me Pakistan pe bomb girany ki zaroorat nhi rahe gi, yeh tolay khud he ek dosry se larty mar jaen gy.
Elections 2013 ne poori quom ko is trha taqseem kr dia hy. Nawaz Shareef or Imran Khan ko pasand krne wale ek dosry se abhi tk nafrat krty hen. Nawaz shareef ya PMLN Lovers ka tola PTI pasandon ko bachgana zehniyat ka malik aur secular, Jub k Molana Fazal ur Rehman ka Tola unko Yahoodi, sharabi or zani or maghrab pasand samajhta hy. PTI k hawari PMLn walon ko paindo, Nawaz Shareef ko bewqoof aur jahil samajhty hen. PMLn ne punjab ko apni taqat ka markaz bana lia hy or PTI ne KPK ko. Is trha sobaiyat mazeed bharny ka andesha apni jagah moujood hy. MQM k poojari Altaf bhai ko apna na-khuda aur Maseeha samajhty hen. In k nazdeek Pakistan ki establishment Muhajiron k khilaf hy or unhen khatam krne ke chakar me hy. Yeh Karachi ko apni jageer samajhty hen. In me se buht saare Qaid e Azam ko sar e aam galiyan dety hen or ye log shaid us waqat ka intizaar kr rhy hen jb Altaf Bhai inki inqilaab ki final call den gy.

Pakistan k mazhabi siyasi tolon me Jamat e Islami or JUI shamil hen. In k nazdeek her wo shaks jo inki jamaat me nhi gumrah hy. In k nazdeek Shia kafir hen or unko is mulk me jeenay ka koi haq nhi. In k nazdeek Qadiyano ko qatal krna baes se sawab hy. Inhen Pakistan me gali me pari shia or sunni bhaion ki lashon se zyada Egypt me apny Salafi bhaion ki lashon ka zyada gum hy. Inhen Economics ki Alif-Bay nhi ati lekin yeh mulk chala sakty hen. In k nazdeek Science ka ilm hasil krne ka koi faida nhi kiun keh ye akhirat me kaam nhi ata. Yeh mulk ko Science, Education or Economics ke bagher sirf duaon or namazon se chala sakty hen. Yeh mazhabi jamaten Taliban k lye be inteha muhabbat rakhti hen or TTP k her hamly ka radd krne ki bajaye usy drones ka reaction keh kr baat khatam kr dety hen.

Dr. Tahir ul Qadri jo ab mazhabi scholar se zyada political activist ya reformer bn chuky hen, un k nazdeek yeh sara system he kharab hy. Un k pass koi economic ya political model nhi hy jo is system ko replace kr sake lekin bahar haal unhen ye nizam tabdeel zaroor krna hy. Unhen aisay sapooton ki talash hy jo 62/63 pe poora utarty hon, imandaar hon, ek pai ki heara-pheri na krty hon or unka kirdaar koray kaghaz ki trha saaf ho. Ho skta hy k unko is awaam me aisy jiyalay mil jaen meny to kabhi nhi dekhy. Hum sub gunahgaar hen. Koi doodh me pani milata hy to ghareeb ya apny bhai ka haq khata hy, koi bijli chori krta hy or koi tex, koi duty ada nhi krta to koi rishwat leta aur deta hy. Hum se her shaks 62/63 ka kahin na kahin mujrim zaroor hoga. Her chand mahinon baad Dr. Sahab ek inqilaab ki azaan dety hen or jamat ka intizaar krna shuru kr dety hen. Wo is intezaar me hen k jesy hen yeh hakoomat economic or social challanges me fail ho wo awaam ko sarkon pe le aen or unhi logon k zariye (jo khud 62/63 pe poora nhi utarty) hakoomat ka takhta ulat den or yoon Tareekh me unka naam Khamini ki trha sunehri haroof me likha jaye. Yoon mulk me afra tafri phely gi, khoon bahy ga or shaid agli hakoomat dobara Fouj k hissy me aye. Pakistan ager Tehreer square bana to phir iska Allah Hafiz.

Mehsoos yoon hota hy k hamary yeh tolay jis jehat pe nikal khare huy hen is ka akhri phal ek civil war ki shakal me nikly ga. Yeh androni ikhtilafaat hamen kamzor kr k torr den gy. Pakistan ko Syria se sabak hasil krna chaye. Wahan mazhabi ikhtilaf ki wajah se bad tareen civil war hui or sara mulk toot gaya. Wahan inqilaab k matwaaly jb Bashar Assad k khilaf nikly to jald hi international powers ne un k revolution ko hijack kr lia. Saudi arab, America ek tarf or Russia, Iran ek tarf. Pakistan ke awam is waqat sarkon pe nikly to darr hy k inka revolution anti-Pakistan forces k haq me jaye ga. TTP, BLA or other internationally funded groups is revolution ko manipulate kr k hijack kr len gy. Waqat ki zaroorat yeh hy k hamary tmam tolay ek dosry ko ikhtilafat smaet qabool kr len. Mulk ko ‘Under supreme rule of Govt’ chalny diya jye. Ager hamen yeh qabool nhi to Pakistan ko Egypt ya Syria banny se koi nhi bacha sakta. Allah hum pe, is mulk pe apna rehm kare. Ameen